Krerët e shteteve dhe qeverive anëtare të Bashkimit Evropian filluan samitin joformal në Salzburg të Austrisë, ndërsa procesi i daljes së Britanisë së Madhe nga Unioni (Brexit) dhe migracioni i parregullt janë temat kryesore, raporton Anadolu Agency (AA).

Presidenti i Komisionit Evropian Jean Claude Juncker në prag të samitit deklaroi se liderëve të Bashkimit Evropian do t’u prezantohen një sërë propozimesh të Komisionit.

“Mbrëmë nuk u realizua ndryshim i dukshëm. Besoj se deri në fund të vitit do të arrihet një marrëveshje për mbrojtjen e kufijve të jashtëm të BE-së”, tha Juncker.

Presidenti francez Emmanuel Macron tha se për Brexit është e nevojshme që të arrihet një zgjidhje e përbashkët e cila do të jetë në dobi të të gjitha palëve.

Ai gjithashtu tha se deri në nëntor duhet të merret një vendim për statusin e Irlandës.

“Gjithmonë në Bashkimin Evropian ka pasur mendime të ndryshme kur në tryezë kanë qenë vendime të vështira. Megjithatë, jam i bindur se të gjithë ne duhet të mbrojmë qëllimet afatshkurtra dhe afatgjata të Unionit”, porositi Macron.

Kancelari austriak Sebastian Kurz tha se ai mendon se çështja e migracionit në BE nuk do të zgjidhet nga programi i shpërndarjes së migrantëve, por problemi mund të zgjidhet duke mbrojtur kufijtë e jashtëm dhe duke bashkëpunuar me vendet e treta.